Sarubhakta – Jadoo

देश परिवेशः पुरातनपन्थी थकाइमा
मस्त निदाइरहेको बेला
एकथरी देशहरु
कालापहाड तर्फ लागेका छन्
मुटू कलेजो हराएर
बूढा सुब्बाका जोखनाहरु मूच्छित छन्
सर्वत्र विद्रोही र छापामारका कुरा
भूकम्पीय क्षतिका भविष्यवाणीसहित
आह ! पालतिर हामीले थुप्रै
ट्रमा सेन्टर खोलेका छौं
भगवानहरु सेल्टरमा छन् – छैनन्
तर हामी गरिवहरु
भगवानका मामलामा साह्रै धनी छौं
कम्ब्याट ड्रेस
एम – १६
नाइटभिजन
स्काई ट्रक …
नाइजेरियाली मिसदङ्गाहरु वीच
हामीले पनि वोधिका केही
नयाँ शब्दावली पाएका छौं
बज्रस्वाँठ अख्तियारहरु
हिरासतमा गाँजाखेती गर्छन्
अनि क्यूपर वेल्टतिर कतै
वरफका ढुङ्गाहरु पल्टाउँदै
पिङ्गपङ्ग भाइरस खेल्छन्
आफन्तहरुबाट कति वेचिए
पराइका चेलीवेटीहरु ?
क्यूरियोका सम्बन्धहरु रुन्छन्
खोई कहाँ हराए जामुना गुभाजुहरु ?
आजभोलि कार्टुनीकृत विषादका सिमसारहरुमा
जादुका धुम पो मच्चिएका छन् ।

Number of Views for this Poem:2438

Sarubhakta – Mithak Utkhanan Ra Sambodhi Ma Harayeka Buddha Haru

समय–संक्रमण
युगीन क्रान्तिका अभिछिन्न भ्रान्तिहरु
दुखेको वेला
किराँतचुलीतिर सलामाण्डरहरु
शिकार खेल्दै हिडे
जीवन अल्झेको छ
दुम्सीकाँडैमा
म प्रेमपत्रको मुठो वोकेर
‘यो जाती भागी हिड्दैन’ भन्ने
मिथक उत्खननमा छु
हिरासतको राजनीति
अभियन्ताहरु अकुत सम्पतिलिप्सामा
सगरमाथाको चोरी गर्दैछन्
धु्रवीय ब्वाँसाहरु
मानसरोवर उच्चतामा
सफ्फोका प्रणयगीतहरु सुन्दैछन्
मन्दिरैमन्दिरको देश
समय–कुरुपेश्वर भगवानको अर्चना गर्छ
यसैले सर्च अभियानहरुमा
सधै योगमायाका उत्सर्गहरुले आत्महत्या गर्छन्
वम बोलेको देश ः वमहरुकै खेती हुन्छ
भष्मासुर युद्धयात्राहरुमा हामीसित प्रसस्त
भाडायुद्ध अनुभव खाँदिएका छन्
कृतिम निषेचन ः हामी आर्सेनिकयुक्त पानी पीडित छौं
यसर्थ मुद्रा बैंकमा यसपाली जेनोमका
जीनहरु जम्मा गरिराखेका छौ
नहाँस इथाकाराज्यका ओडियसहरु
यतिखेर हाम्रा सैनिकहरु
अरिङ्गालले चिलेर घाइते छन्
आउ, मानवढाल वनाऔं
हामीसित जंगलमा गैडाहरुको अकाल छ
जीवन–एक मृत्युचिन्तन
वुद्धहरु सम्वोधिमा हराएका छन्
आह ! हामी युगयुग किन
देवताका दोषहरु थामिवस्न अभिशप्त छौं ?

Number of Views for this Poem:2446

Sarubhakta – Deshemaru Desh

दूरभिसन्धिमा
रगतका लिपस्टिक लाएर
क्रूरहत्याका उद्योगहरु चलेका छन्
तुहिनाचलतिर
तुइनहरु
र खेलौनाका ग्लोवहरु
निहत्था शब्दहरुका वलि चढ्छन्
काण्डैकाण्डहरुको देश
पल्टनका घाउहरु कोट्याएर
डाँकाहरुको समाजप्रेम पढिरहेछ
बिच्छीहरु बिच्छीहरु जस्ता छैनन्
डेन्ड्राइट सुघ्दै हिडेका भविष्य
टुँडालका अर्धसत्यहरुमा अनुवादित छन्
अर्थ र जिन्दगी ः एक शाश्वत समस्या अशाश्वतताको
यसर्थ आउ, इन्द्रदहमा स्नान गरौं
अनि नोर्वुलिङ्ग दरवारतिर घुम्न जाउँ
अपच्र्युनिटी इन्फेक्शनः ईश्वरको धर्तीमा
मान्छेका समस्याहरु
आउ, निरुद्देश्य सगरमाथाको चढाइमा हामी
सगरमाथा जत्तिकै खाल्टो खनौं
ए ! विदेश नजाउ
आजभोलि वीरगति प्राप्त गर्ने सुविधा
देश भित्रै छ
यो के भा’को ?
हामीसित देशेमरु झ्या छ कि
देशेमरु प्रजातन्त्र छ ?

Number of Views for this Poem:2041

Sarubhakta – Akhet Parba

सर्पदंशित समय
मृत्युको जन्मदिन मनाउँदै छ
कफ्र्यू लागेका मनहरु
हत्याका कन्सर्टहरु सुन्दैछन्
सांग्रिलाभरि
राष्ट्रिय डाँकाहरु
मान्छेका विस्कुनहरु सुकाएर
वैकल्पिक देश खोज्दैछन्
ग्रहण लागेको वेला
प्रायश्चितमा नोबेलका डाइनामाइटहरु रुन्छन्
टाटपल्टेका राष्ट्रियताहरु
वाणासुरका हातहरुमा पर्छन्
ए के भयो यो देशलाई ?
कतै म्यागलुङ जलेको छ कतै जुम्ला ध्वस्त छ …
भूपरिवेस्टित देश
हामी आँसुका समुद्र खन्दैछौं
हाइड्रोसिफालस ः प्रतिगमनका हाउगुजीहरु
के हामी पराभूतपुस्ताका बहादुरीले
क्षेप्यास्त्रका शान्ति खोज्दैछौ ?
हेर ! हेर !
बाघहरुको देशमा स्यालहरुको आतङ्क छ
यसर्थ एकथरी भद्रभलादमीहरु
भ्यालेन्टाइन दिवसका मुखुण्डालाएर
विश्वपरिभ्रमणमा निस्किसके
कुन गान्धारीको सरापले सर्वसंहारयुद्ध व्यस्त छन्
नेपाली यदुवंशीहरु ?
आजभोलि श्रीकृष्णजीहरु छद्मभेषमा
रत्यौली पो खेल्दैछन्
ए, जगेडा नेपालीहरु कहाँ छन् ?
आउ, सतीको सरापलाई रक्षा गरौं
अनि सधैं देशको कुभलो चिताऔं
आखेटपर्वीय होम
स्वाहा ! स्वाहा ! वीरताका इतिहासहरु
हिजो गोर्खालीहरुदेखि वैरीहरु डराउँथे
आज नेपालीहरु देखि नेपालीहरु डराउँछन्

Number of Views for this Poem:1870

Sarubhakta – Nepal Kam Nepal

कालो चट्याङ्गः पीडाका खरपसहरु दुखेर
जीवनका मृत सागरमा
म रोलर कोस्टरका सपनाहरु देख्दैछु
ढापसुङ वस्तीतिर
कठपुतली आत्माहरु
साइवरयुगीन ‘किस्.कम्’ नाट्यरचना गर्दैछन्
संघात तरङ्गः दन्दनाउँदा रथहरु
भुत्याहा जाहाजहरुमा सवार छन्
पग्लिएका ढुङ्गाहरु
कालमसानतिर कल्की अवतारहरु
पर्खिरहेछन्
ए खोई विस्तृत नेपालका सपनाहरु ? के हामी
ब्यूझिसक्यौ र ?
एकीकरणका खुँडाहरु फलामे रक्षाकवच लाएर
व्हेलका दाँतभाँच्न हिडेका छन्
वीरगनः विजुलीबन्दुक
खोई हनुमानध्वजका परिघटनाहरु ?
आउ, फेरि एकपल्ट पत्थरकला बोकेर
जिउँदै शवपरीक्षा हुने वस्ती तिर जाऔं
उः ! वुद्धका कुरा गर्ने वात्सायनहरु
कुरुप सुन्दरीका कुरा गर्दैछन्
ग्राहक पर्खेका मसाज पार्लरहरु
वेवसाइटमा इन्टरनेट फ्रेन्ड फाइन्डरतिर
के हेर्दैछन् ?
‘कामरेड मिटिङमा होइसिन्छ ।’ धनधान्य
कामरेडहरु आश्वस्त छन्
आह ! हामी कसिङ्गर फाल्ने कन्टेनरका खोजीमा कहाँ छौ, कन्टेनर फाल्ने कसिङ्गरका खोजीमा
पो छौं !
काम पाइएन ? त्यसो भए जाऔं टाउकाले टेकेर
विश्वरेकर्ड बनाऔं
जिन्दगी सिङ भाच्चिएका अर्नाहरुको दौड हो
हारे यत्रैसित !
को ठूलो ? सत्रुका हातबाट मारिएका शहीद
कि आफन्तका हातवाट मारिएका शहीद ?
शहीद हुनेहरु सबै निख्रिसकेका छैनन्
यसर्थ विवाद जारी छ
म्यूजियममा हाम्रो इतिहास छ,
विदेशमा हाम्रो वर्तमान छ,
भविष्य हाम्रो कहाँ छ ?
के थाहा ?
हामी राष्ट्रिय निकुञ्जका नेपाली हौं

Number of Views for this Poem:3596