राजेन्द्र शर्मा – शीशा र रत्नहरु
सूर्यको किरण
फुटेका शीशाका टुक्रामाथि झरेपछि
जाज्वल्यमान् ज्योतिपुञ्जहरु झैँ
झल्झलाकार छन्
प्रत्येक टुक्रा
लाग्छ उनीहरु नै हीरा हुन् ।
मानौ यस धर्तीमा
उनीहरु बाहेक
टल्कने अरु बस्तु नै छैनन्
अरु त टल्कन जान्दै जान्दैनन् ।
शताव्दीयौँ देखि
यस्तै हुँदै आइरहेको छ
यस शहरमा
कुनै नौलो र अचम्मको घटना होइन यो ।
पहिले पनि फुटेको शीशा
यस्तै टल्केको थियो
आज पनि उस्को स्वरुपमा
रत्तिभर फरक छैन
चम्काइ उही हो टल्काइ उही हो ।
जोहरीहरु मोलतोल गरिरहेका छन्
सबभन्दा धेरै टल्कने
सबभन्दा ठूलो दाम पाइरहेछ
त्यसैले शहरका टुटे फुटेका शीशाहरु
अथक प्रयत्न गरेर आफूलाई टल्काइ रहेछन् ।
लिलाम बढाबढको बजारमा
उत्तर दक्षिण र पर परका जोहरहरु
भेला भएका छन्
शायद पहिले पनि यिनीहरु सजिएका हुँदाहुन्
ती जोहरका बैठक र शयनागारमा ।
यसपाली फेरि शीशाहरु
अमूल्य रत्न झैँ बिकेका छन्
जोहरहरुका उन्माद र अट्टाहासमा
फेरि पनि उज्यालो भरिएको छ ।
फुटेका शीशाहरु
हीरा र मोती झैँ सजाइका छन्
पाहुना घरहरुमा
मूल्यवान बनाइका छन् ।
पुनः एकपल्ट उपहास भएको छ
रत्नहरुको हीराहरुको अनि अमूल्य मोतीहरुको ।
धरान
Sanjaal.com is owned and maintained by Sanjaal Corps, Nepal. The company offers Web hosting and Domain Registration Services, IT Solutions and Business Analysis. Sanjaal Corps develops Open Source Software Development for Android Based Smartphone and Tablet Devices in addition to providing Technical Solutions.We also offer customized data backup, data recovery, data hosting and voip solutions.