Pratima KC – Samaya Ko Khel

प्रतिमा के.सी. – समयको खेल

म समय हुँ
समयको खेल खेल्नु छ
कति खेल्नु पुराना खेलहरु
अब नयाँ खेल फेर्नु छ
त्यसैले
साबधान !
मलाई रोक्ने चेस्टा नगर्नु /

प्रेम शान्तिको प्रतिक हो
घृणा युद्धको बीउ हो
म मानव मनभित्र
त्यही बीउ भएर रोपिएको छु
त्यसैले
साबधान !
मलजल गर्दै गर्नु /

म उम्रदै छु
हाँगाहरु हाल्दै छु
पुराना पातहरु झारेर
नयाँ पातहरुमा पलाउँने गर्छु
तिम्रो उचित मलजलले
बलियो र तन्दुरुस्त भइ
धरै परिमार्जन गर्नु छ /

तिम्रो सुन्दर प्रकृतिको बगैंचालाई
एउटै आगोको फिलिंगो बनेर
डढाउन सक्छु
लाखौँ का पुलहरू
करोडौंका बाटाहरु
अरबौंका भवनहरु
एउटै बमको डल्लो भएर
टुक्रा टुक्रा बनाउनसक्छु
म छिन भरमै
सेतीहरुमा बाढी भएर आउँछु
औरही हरुमा
आगो भएर बल्छु
पाकेको बालीमाथी
असिना भएर झर्छु
म त यस्तै खेलहरु खेल्छु
बिकास होइन बिनाश बोकेर हिड्छु
बिज्ञान र प्रविधिलाई पनि
असफल पारिदिन्छु /

तिम्रो पुर्खाले
एकीकरण गरेको
नेपाल राज्य प्रति पनि
मलाई इर्ष्या छ
तिम्रो देशलाई
बाख्रो जस्तै काटेर चोक्टाएर
मासुको बिला लगाउनु छ
समयको परिवर्तन संगै
तिम्रो नाम थरमा पनि
परिबर्तन गर्नुपर्ने छ
अब राई लिम्बु बाहुन क्षत्री मगर गुरुङ होइन
राम बहादुर सिंह , श्याम बहादुर बाघ ,
सीतादेवी बाँदर ,रितादेबी ढेंडु
मन प्रसाद कुकुर ,धनिराम बिरालो
गायत्री चिल ,सरस्वती गिद्ध भनेर
नब न्वारन गरी
मानव जनावरको देश
बनाउनु पर्ने छ
तिम्रो राष्ट्रगान सच्चाउनु पर्ने छ
देशको नक्सा फेर्नु पर्ने छ
गौतमबुद्ध र सगरमाथाको नाम
बेच्दा बेच्दा थकितहरु हो
विश्वमानचित्रबाट नाम हटाएर
नयाँ नाम युद्धस्तान राख्नु पर्ने छ
म समय हुँ पर्खी रहनु
समयको खेल अझै खेल्नु छ /

यति मात्र कहाँ हो र !
मान्छेको परिभाषा
नबुझ्नेहरु हो
आलो र तातो रगतको नदीमा
रक्तास्नान गराई
दनदनी बलेको अशान्तिको पंचाग्नीमा
होमन गरेर
मानव, मानव सभ्यता र अस्तित्वलाई
खरानीमा रुपान्तरण गर्नुपर्ने छ
त्यसैले
म समय हुँ
पर्खि राख्नु
समयको खेल
अझै खेल्नु छ /

२४ मे २०१२
रेडिंग, बेलायत

Number of Views for this Poem:1280

Pratima KC – Maya Dekhen Maile (Nepali Gajal)

प्रतिमा के.सी. – माया देखें मैले (गजल)

उनको नजर भित्र किन माया देखें मैले
आँखाबाट जीवनलाई झार्नु रैछ ऐले

प्रित फुल्ने सारा संसार जीत आफ्नै लाग्थ्यो
उनको मेरो मन मुटु एकै भाथ्यो जैले

जीवनभरी साथ दिने वाचा हाम्रो भाथ्यो
आसा थियो आँसु पिउनु पर्ने छैन कैले

मायाप्रीत भन्ने चिज मलाई यस्तो लाग्यो
पाएपछि पित्तल सरी हिरा हुन्छ पैले

४ मार्च २०११
बेलायत

(Sent to Sanjaal Corps via email)

Number of Views for this Poem:2850

Pratima KC – Hareko Sapana

प्रतिमा के.सी. – हारेको सपना

हर रात मेरो सपनामा
अनगिन्ती बालिकाहरु
बामे सर्दै आउँछन
र भन्ने गर्छन
हाम्रो बालअधिकार खोई ?
भेदभाब रहितको बातावरण खोई ?
डाक्टर ईन्जीनियर बनाउने सपना खोई ?
भन्दै तोते बोलीमा प्रश्न गर्छन
अनि म माथी आक्रमण गर्छन
मलाई पिट्छन् टोक्छन् र लुच्छन
न्यानो संरक्षणको अभावमा
रुन कराउन थाल्छन
म चुपचाप हेरी रहन्छु /
हर रात मेरा सपनामा
असंख्य युबतीहरु
केहि हराए झैँ अलिकति डराए झैँ
ठिंग उभिन्छन र भन्छन्
हाम्रो इज्जत खोई? हाम्रो समानता खोई?
बेचिनु पर्ने हाम्रो जीबनको मुल्य खोई?
उनीहरु पनि म माथि आक्रमण गर्छन्
म नतमस्तक उभिइरहन्छु /
हर रात मेरा सपनामा
आधा आकाश र आधा धर्तीको भार थाम्ने
अधबैँसे नारीहरु र जीवनलाई सकी नसकी
थेगीरहेका बृद्धा आमाहरु मलाई घेरा हाल्छन र सोध्छन
महिला अधिकार खोई ?
जन्मदेखि मृत्यु बिचमा भौतिक र मानसिक रुपमा
हेरक क्षणमा बलात्कृत हुनुपर्ने
अवसर गुमाउनु पर्ने
दोस्रो दर्जामा गनिनु पर्ने
पुस्तौदेखि यस्तै अपहेलित हुदै काटिरहेका पिडाहरुलाई
मेरो आगनमा पक्छ्याल्तै पोख्छन्
रुन्छन्, कराउछन् र भन्छन्
हामी कहिले मानव भएर जिउने?
मैले उनीहरुका यी कारुणिक पीडालाई
टिप्न सक्दिन , बोल्न सक्दिन र मसंग उत्तर पनि छैन
म पनि यही लडाई लडिरहेकै छु
त्यसैले,
मैले मेरा हर सपनामा
हारेको अनुभव गर्छु
मैले हारेको सपना
हर रात देख्ने गर्छु /

८ जनवरी २०११
बेलायत

(Sent to Sanjaal Corps via Email)

Number of Views for this Poem:1622

Pratima KC – Chaubandi Fariya Maasdai Chhu (Nepali Gajal)

प्रतिमा के.सी. – चौबन्दी फरिया मास्दैछु (गजल)

अझै छ घाउ यो छातीभरी बिर्सनलाई हास्दैछु साथी
दुखेको देश राखेर भित्र यतै पो नाता गास्दैछु साथी

फेरियो भन्छन राष्ट्रिय पोशाक जे लाए पनि हुने रे
यहाँ त हेरी नसक्नु छ चौबन्दी फरिया मास्दैछु साथी

झगडा छ भागबन्डामा भित्र मिच्दै छन् छिमेकी सिमाना
हराउन सक्छ कुनै बेला देशको नक्सा टास्दैछु साथी

बेचिदैछ मठमन्दिर अनि श्रद्धा र भक्तिभाव पनि
जोगाउँनलाइ सस्कृति धर्म कहिले उपास्दैछु साथी

अझै छ घाउ यो छातीभरी बिर्सनलाई हास्दैछु साथी
दुखेको देश राखेर भित्र यतै पो नाता गास्दैछु साथी

२२ फेब्रुअरी २०१२
रेडिंग, बेलायत

Number of Views for this Poem:622

Pratima KC – Prakriti Tainle (Nepali Gajal)

प्रतिमा के.सी. – गजल: प्रकृति तैले

सुन्दर संसार रचेर किन गोडेर लगिस प्रकृति तैले
मानब मुटु दिएर किन फोडेर लगिस प्रकृति तैले

नराखेर केहि दया धर्म हजारौ मानिसको बस्ती उजाडी
कठै नि लछार पछार गर्दै तोडेर लगिस प्रकृति तैले

आफन्तहरु छुटाई फुटाई धेरैको एकै चिहान गराई
बाँच्नेलाई जीबनभरी पींडा छोडेर लगिस प्रकृति तैले

बुढाबुढी लालाबाला अनि युवा सबैको भाबना जिलाएर
बिभत्स रुप सुनामीको नाम जोडेर लगिस प्रकृति तैले

त्राही त्राही पारेर मान्छे आइस संसार नै त्रसाउने गरि
ज्ञान र विज्ञानको गति पनि मोडेर लगिस प्रकृति तैले

( ११ मार्च २०११ गतेका दिन जापानमा गएको नरसंहारकारी भूकम्प तथा सुनामीबाट प्रभाबित सम्पूर्ण मानब समुदायको स्मृतिमा रचित गजल )

१७ मार्च २०११
बेलायत

(Sent to Sanjaal Corps via Email)

Number of Views for this Poem:2135