डा.ज्ञानू पाण्डे -जिन्दगी
देखेदेखें जस्तो लाग्छ
हेर्न केही भ्याइदैन
प्रश्नैप्रश्न जताततै
उत्तर कतै पाइदैन
भीडहरूमा एक्लो–एक्लो
आफैलाई आफू नौलो
जीवन खोई यो कस्तो कस्तो ?
घरि केही हो कि जस्तो
घरि केही पनि यो होइन जस्तो ।
अन्त्यपछिको सुरु हो कि
सुरुबाटै अन्त्य हो यो
अनिच्छाको प्राप्ति हो कि
प्राप्तिको इच्छा हो यो
कहिले अन्धकार भीर जस्तो
कहिले ठाडो उकालो यो
जीवन खोई यो कस्तो कस्तो ?
घरि केही हो कि जस्तो
घरि केही पनि यो होइन जस्तो ।
हास्न खोज्दा आँसु झर्छ
पोछ्न खोज्दा रसाउँछ
तड्पाउँछ/विझाउँछ
भाग्न खोज्दा पच्छ्याउछ
कहिल्यै तृप्त नभइने
जीजिविषाको शूल जस्तो
जीवन खोई यो कस्तो कस्तो ?
घरि केही हो कि जस्तो
घरि केही पनि यो होइन जस्तो ।
अभिशाप हो स्वतन्त्रताको
कहाली आफ्नै चेतनाको
अरोजाईको रोजाई यो
जिम्मेवारीको कबुल जस्तो
न खा’को विष हो यो
न ला’को प्रित हो
नजन्माको सन्तानको
माया मोहको रित हो यो
जीवन खोई यो कस्तो कस्तो ?
घरि केही हो कि जस्तो
घरि केही पनि यो होइन जस्तो
केही पनि यो होइन जस्तो
केही पनि यो होइन जस्तो
विशालनगर, काठमाडौं
२०६५ चैत्र २४ गते
Sanjaal.com is owned and maintained by Sanjaal Corps, Nepal. The company offers Web hosting and Domain Registration Services, IT Solutions and Business Analysis. Sanjaal Corps develops Open Source Software Development for Android Based Smartphone and Tablet Devices in addition to providing Technical Solutions.We also offer customized data backup, data recovery, data hosting and voip solutions.