Deep Raj Neyong-Hang – Aankha Ra Chitra Haru

दीपराज नेयोङ्हाङ – आँखा र चित्रहरु

मेरा सुन्दर चित्रहरु
किनिदिनेहरु कोही भएनन्
अध्याँरो कुनामा थन्काउँदा थन्काउँदा
श्याम–श्वेत बनेका छन
रङ्गहरुले चित्र पोतेका छैनन
बस्तीहरुमा मानिसहरु छैनन
लस्तिएको म
भुगोलबाट माथी माथी हेर्छु
चन्द्रमा टल्कन्छ
चन्द्रमाबाट माथी माथी हेर्छु
भूगोल टल्कन्छ
अन्तरिक्ष दोसाँधमा
माथीको बोधमा वास्तवित्ता खोज्दै
बिना गुरुत्वाकर्षण म उड्दैछु
यता उता…उता यता…

लिटिलब्याई र फ्याटमेन
बिटुलिन खोजिरहेको बेला
आईन्स्टाईन फेरि एक सम्झना
तर स्याउ माथीबाट किन खस्छ
अहँ
न्युटनहरु हेर्दैनन् अचेल
हो त्यसैले त अब
स्याउहरु माथी माथी जान्छन
लिटिलब्याई र फ्याटमेनहरु तल तल झर्छन्
आदिम युगको आदिम पाईलाहरु
पाईलिदै पाईलिदै गरेका डोबहरुमा
हाम्रा हरिया हरिया खर्कहरुमा
हाम्राबिजहरु उडाउँन माथी माथी र
झार्न बरमुडा ट्रयाङ्गलमा

आज कोलोजिएमको एक तमासामा
आफ्नै अनुहार रगतपच्छे छ
आनन्दित मनाउँनेहरुको हुटिङ्गमा
अर्को आवाज बिलाएको छ
म बुलन्द गर्न
फिरउन आईपुग्न अघिनै लाल समुन्द्र तर्ने छु
चट्टानका फोहोराहरुबाट झरेको
जिवनको पानी पिएर
बाँच्ने र बचाउँने छु-फेदाङ्गमाहरुलाई
किन की फलाक्नु छ फेरि
बाँच्नु छ फेरि बिरामीहरु
हाम्रा बस्तीहरुमा
उस्तै, पहिलाजस्तै
उर्वर र फराकिला पाखाहरुमा
वर–पिपल चौतारीमा
बिसाउँन थकित काँधहरु

कागले सत्य टिप्न अघिनै
कोईलीको चुच्चोभरी
सत्यका झिल्लीहरु बगिरहेका हुन्छन
खोक्रो करङ्गमा थोत्रो कोट ओडाएर
बुख्याँचा ढाटिएको छ पलपल
बुख्याँचा देखाएर पंक्षीहरु ढाटिएका छन् उस्तै गरी
बाचाका मुर्त चित्र एकलब्य औंलाहरु अब
सनसनी बोल्न थालेका छन
यहाँ नदीका दोभानहरुमा
राता राता ज्वलाहरु उत्पन्न हुन्छन
हाम्रा राता राता बस्तीका छाँयाहरुले
आकाश रातो भएको छ
त्यसैले
पानी रातो बर्षिएको छ
आफ्नै आँगनमा
त्यसैले
झण्डाहरु राता राता छन्
किल्ला किल्लामा
त्यसैले
मान्छेका आँखाहरु राता राता छन
जस्ले
मेरा आँखाहरु तिर्मीराएका छन
हो त्यसैले अब
म सभागृहका प्रयोगशालामा
अनगिन्ती जारहरुमा
रासायनीक समिकरणको प्रयोगमा
अम्ल र क्षारको समिस्रणमा
रक्तकोष बिहीन मानवको
सृजना खोजिरहेको छु

पथरी – कोशी, मोरङ

Related Articles:


Sanjaal.com is owned and maintained by Sanjaal Corps, Nepal. The company offers Web hosting and Domain Registration Services, IT Solutions and Business Analysis. Sanjaal Corps develops Open Source Software Development for Android Based Smartphone and Tablet Devices in addition to providing Technical Solutions.We also offer customized data backup, data recovery, data hosting and voip solutions.

Number of Views for this Poem:1725

Deep Raj Neyong-Hang – Poorba Astaundai Gareko Ghaam

दीप राज नेयोंगहांग – पुर्व अस्ताउदै गरेको घाम

साँगुरी भञ्याङ्गपारि क्षितिजबाट
उदयमान् घाम
चिसो आङ्ग सेकाउदै निस्कन्छ
घुँगी सिपीको हराउँदो बास
छेपारोको कथासँगै
राउटे र कमैयाका गाँउहरुमा
गल्लीहरु जङ्गल पस्दैगरेको देखिरहेछु
रातहरु उज्यालो कहीँ
उज्यालोहरु रात कहीँ
लाटोकोसेरो र चमेराका
आँखाहरुमा उज्याला रात टल्किरहेछन्
मान्छेका आँखाहरुमा
अध्याँरो दिनको
घुर्मइलोपनाहट अविरल छ अघि
पिरामिडका लासहरु
मरेरै भए पनि
नव युगलाई अवलोकन गरिरहेछन्
मुर्तिवत् जिउँदा मान्छेको एक हुल
डोल्पाली डाँडा पाखाबाट नियाल्छ–
लालीमय आधारबाट
नयाँ युगको उदाउँदो घाम
डाईनोसरको कथा बोकेर
पश्चिमबाट
पूर्व पूर्व डोल्पामा
अस्ताउँछ–घाम

आफ्नै मृटीकामा
सदियौं नुहिएर पढिरहन्छ–
लिनिङ्ग टावर
युग युगका
सभ्यताका कथाहरु

अक्षवरत सिंडी सिंडीमा लमक्…क लमम्…क  उक्लँदै
मा…..थी माथीबाट त…
…ल
त…
…ल
सिम्सारका हाम्रा सिमे-भूमे देवताहरु
पानीबिना मर्दैगरेको देख्दा
पाण्डवी कथाहरु बोकेर
पश्चिमबाट बिस्तारै
पूर्व पूर्व
सतार र मुसर  गाँउमा
अस्ताउछ–घाम

भेद विभेद
सत्य असत्य
उस्तै बोल्छन्
उस्तै खेल्छन्
राजहंसको खोजीमा
समय-यान बतासिरहेको छ
कँही सत्यमय – सत्य
कँही असत्यमय – सत्य
मुर्तिहरु पनि किन नबर्बराऊन्
बागमती रुँगेर युगौँ बिताउँदा पनि
वीरुपाक्ष उम्रनुको सट्टा दिनानु्…
…भासिरहेछ
सत्यत्वको शल्याक्रियामा
गोहीका आँशु टिल्पिलाउँदा
बसाईँ सर्ने
धेरै धेरै जनावरहरुको कथा लुकेको देखिरहेछु
जब टप्किन्छ
ट..
.प्प
ट..
.प्प
भुईँमा
फेरि एउटा नँया कथा लेखिन्छ
गड्यौलाहरु
लसक्….क लसक्….क लस्कँदै
इतिहास पढ्न शुरु गर्छन्
माटो भरि भरि
बिस्तारै बिस्तारै
पश्चिमबाट पूर्व पूर्व आफ्नै भूमिमा
अस्ताउँछ–घाम।

पथरी - ५ किराती चोक
कोशी - मोरंग
हाल आबु धाबी यू ए ई  

Related Articles:


Sanjaal.com is owned and maintained by Sanjaal Corps, Nepal. The company offers Web hosting and Domain Registration Services, IT Solutions and Business Analysis. Sanjaal Corps develops Open Source Software Development for Android Based Smartphone and Tablet Devices in addition to providing Technical Solutions.We also offer customized data backup, data recovery, data hosting and voip solutions.

Number of Views for this Poem:1725

Deep Raj Neyong-Hang – Samaya Ra Chhayan

दीप राज नेयोंगहांग – समय र छाँया

युगका साँची
अट्टल पत्थरहरुमा
लेउका लेपनहरु पखाल्दै
खोजिरहेछन् मान्छेहरु यथार्थ रङ्ग
समयसँगै
पानी बगीरहन्छ निरन्तर
खियाईएका पत्थरहरुमा
युगका तरङ्गीत ध्वनीहरुका
तस्विरहरु कोरिन्छन
उही रङ्गमा
बसन्तमा खसेका कोपिलाहरु
शिशिरमा पत्थर बनि फुल्दैछन्
नितान्त
आफ्नै अनुहारमा
नितान्त
आफ्नै आकृतिमा
केवल लेउका खास्टोहरुले
वास्तविक्ता छोपिदैछ
त्यसैले
पत्थरले आफ्नो  रङ्गको
उन्मुक्ति खोजेको छ

स्वतन्त्र त
उहीले उहीले
सभ्यमानवको घाम उदय हुन अघिनै
लिबर्टीको स्तम्भ बिनानै
उन्मुक्त रामापिथेकस स्वच्छन्द बाँच्थ्यो
दिर्घायु हुन्थ्यो
अहिले महामानवहरु
उन्मुक्तिको नाममा
महातिर्खा मेट्न
लालसागरहरु पिउँछन्
लिकन हड्डीका स्तम्भमाथी चढेर
पृथ्वीको गर्भमा मानवता चुस्छन
तस्मात
थेग्रिन्छ
द्वन्द
रङ्ग विपरित
द्वन्द
जाती विपरित
द्वन्द
लिङ्ग विपरित
द्वन्द
धर्म विपरित
द्वन्द
समुदाय विपरित

अब
भूगोल
आफ्नो निशामा बिस्तारै
घुम्दैछ विपरित दिशा
तसर्थ
उल्टो बोधमा
पूर्व सधै अस्ताउँछ
किङ्गकर्तब्यविमुढ मान्छेहरु
अत्यासका रौदालोमा लपेटिएर
खोज्दैछन राँको
भेट्टाउन
बाबेल (Babel) टावरबाट छरिएका
वास्तविक बहुरङ्गहरु ।
पथरी - ५ किराती चोक
कोशी - मोरंग
हाल आबु धाबी यू ए ई  

Related Articles:


Sanjaal.com is owned and maintained by Sanjaal Corps, Nepal. The company offers Web hosting and Domain Registration Services, IT Solutions and Business Analysis. Sanjaal Corps develops Open Source Software Development for Android Based Smartphone and Tablet Devices in addition to providing Technical Solutions.We also offer customized data backup, data recovery, data hosting and voip solutions.

Number of Views for this Poem:1725